Binolar tashqi ko‘rinishining tarixiy arxitekturasi saqlab qolinadi
Bu haqda Davlat aktivlarini boshqarish agentligi maʼlum qildi.
“Sharq” nashriyot matbaa korxonasi” AJga tegishli binolar tashqi ko‘rinishining tarixiy arxitektura qiyofasi saqlab qolinadi. Bu haqda Davlat aktivlarini boshqarish agentligi maʼlum qildi.
Qayd etilishicha, Toshkent shahar Buyuk Turon ko‘chasi 41-uyda joylashgan bino-inshootlar bugungi kunda bo‘sh ekanligi va taʼmirtalabligi sababli xususiylashtirilishi belgilangan.
Ushbu bino Toshkent shahrining tarixiy arxitekturasini, shu jumladan, muhim “modernizm” qiyofasini aks ettirishini inobatga olib, uni saqlab qolish maqsadida savdoning quyidagi asosiy shartlari belgilangan:
O‘zbekiston milliy axborot agentligi (UzA)ning maʼmuriy binosi hamda Buxoro va Buyuk Turon ko‘chalari kesishmasidagi 4-qavatli maʼmuriy bino (“A.Navoiy teatri” tomonidagi qismi) tashqi ko‘rinishining tarixiy arxitektura qiyofasini saqlab qolish;
kelgusida qurilish taʼmirlash va rekonstruksiya ishlarini Madaniy meros agentligi bilan kelishilgan holda amalga oshirish.
Bu degani xaridor, mulkiy majmuaning ushbu qismlari tashqi ko‘rinishining tarixiy arxitektura qiyofasini saqlab qolinishini taʼminlaydi, taʼmirlash ishlarini Madaniy meros agentligi bilan kelishgan holda amalga oshiradi, agarda mazkur shartlar xaridor tomonidan buzilgan taqdirda, xususiylashtirish masalasi shartnoma talablariga asosan qayta ko‘rib chiqiladi.
Ushbudan kelib chiqib, jamoatchilikni bezovta bo‘lmasliklarini so‘raymiz va mulkiy majmuani xususiylashtirish ishlari qatʼiyan yuqoridagi talablarga rioya etgan holda amalga oshirilishi va xususiylashtirish jarayonlarining har bir bosqichi to‘g‘risida jamoatchilikni xabardor qilib borilishi taʼminlanadi.
