O‘zbekistonning Dubaydagi yangi bosh konsuli o‘z vazifasiga kirishdi
U Dubayga tayinlanishidan avval 2018-2023 yillarda O‘zbekistonning Nyu-York shahridagi bosh konsuli bo‘lib ishlagan.
O‘zbekistonning Dubay shahrida yangi tayinlangan bosh konsuli Kamol Ikromov Birlashgan Arab Amirliklari Tashqi ishlar vazirligining Dubay bo‘limi direktori Shayx Maktum bin Butti Al Maktum bilan uchrashdi va konsullik patentini qabul qilib oldi.
Shayx Al Maktum yangi tayinlangan bosh konsulni Amirliklardagi diplomatik missiyasining boshlanishi bilan samimiy tabrikladi va uning diplomatik faoliyatida muvaffaqiyat tiladi.
Suhbat chog‘ida O‘zbekiston va BAA o‘rtasidagi ikki tomonlama munosabatlarning bugungi holati va uni rivojlantirish istiqbollari muhokama qilindi. Iqtisodiyot, savdo, sarmoya, yuqori texnologiyalar, innovatsiyalar, sanoat kooperatsiyasi, qishloq xo‘jaligi, energetika, transport, turizm, fan va madaniyat sohalarida o‘zaro hamkorlikni yana-da chuqurlashtirish istiqbollari xususida fikr almashildi.
Tomonlar O‘zbekiston va BAA fuqarolarini o‘zaro viza talablaridan ozod qilish to‘g‘risidagi bitim imzolangani so‘nggi yillarda ikki davlat erishgan o‘zaro anglashuvning yuksak darajasi va hamkorlikni yana-da rivojlantirishdan manfaatdorlikning tasdig‘i ekanligini qayd etishdi.
Eslatib o‘tamiz, yangi bosh konsul 44 yoshda. U Dubayga tayinlanishidan avval 2018-2023 yillarda O‘zbekistonning Nyu-York shahridagi bosh konsuli bo‘lib ishlagan.
O‘zbekiston Bosh konsulxonasi konsullik okrugiga Dubay, Sharja, Ras al-Xayma, Ajman, Um al-Kuveyn va Fujayra amirliklari kiradi.
