Metroda qizga shilqimlik qilgan erkak qamaldi
Holat “Buyuk Ipak yo‘li” bekatida yuz bergan.
Toshkent metrosida bir qizga shilqimlik qilgan 31 yoshli erkak 5 sutkaga qamaldi.
Jinoyat ishlari bo‘yicha Mirzo Ulug‘bek sudida 31 yanvar kuni bo‘lib o‘tgan sud majlisida erkak o‘z aybiga iqror bo‘lmadi, metro vagonida odamlar ko‘pligini aytib, unga qiz orqaga yiqila boshlagandek tuyulganini vaj qildi. Shu sababli qiz yiqilib tushmasligi uchun yelkasidan ushlab olgan ekan.
Biroq sud jarayonida jabrlanuvchi uning so‘zlarini rad etdi. Uning ko‘rsatmalari ish materiallarida mavjud bo‘lgan boshqa dalillar bilan ham tasdiqlandi. Bundan tashqari, oxirgi bekatga yetib kelganida, erkak boshqalar bilan tushmay, qizni kutdi va unga ergashdi.
Sud 31 yoshli erkakni O‘zR MJtK 41-1 moddasi (Shahvoniy shilqimlik qilish) 1-qismida nazarda tutilgan jinoyatni sodir etganlikda aybdor deb topdi va unga 5 sutka maʼmuriy qamoqqa olish jazosi berildi. Shuni taʼkidlash kerakki, erkak bir yil ichida xuddi shunday huquqbuzarlikni sodir etsa, u bazaviy hisoblash miqdorining besh baravaridan yetti baravarigacha miqdorda jarimaga tortiladi yoki o‘n besh sutkagacha maʼmuriy qamoqqa olinadi.
