Endi ayollar ham avtobus va yuk mashinasini boshqara oladi
Transport sohasida gender tenglikni taʼminlash imkoniyati yaratildi.
Vazirlar Mahkamasining tegishli qaroriga [85-son] muvofiq Hukumatning 2018-yil 31-maydagi 408-son qarorining 2-ilovasi 27-bandi hamda 3-ilovasi 5-bandi oʻz kuchini yoʻqotdi. Bu haqda Transport vazirligi xabar qildi.
Shu tariqa ayollarga quyidagi yoʻnalishlar boʻyicha mehnat faoliyatini olib borish uchun huquqiy asos yaratildi:
-
yuk koʻtarishi 2,5 tonnadan ortiq boʻlgan yuk avtomobillarini boshqarish;
-
yoʻlovchilarning soni 14 kishidan ortiq boʻlgan avtobuslarni boshqarish.
“Eski normalarning bekor qilinishi bilan ayollarga qoʻshimcha kasb va sohalarda mehnat faoliyatini olib borishi uchun huquqiy asos mustahkamlandi. Shuningdek, transport sohasida gender tenglikni taʼminlash va katta sigʻimli avtobuslarni (elektrobus) boshqarishga ayollarni jalb etish imkoniyati yaratildi”, — deyiladi xabarda.
Qayd etilishicha, zamonaviy avtotransport vositalarining texnik xususiyatlari ayollarga ushbu sohalarda qulay va sogʻliqlariga zararsiz mehnat faoliyatini olib borish imkonini beradi.
