Litsenziyasi bekor qilingan nodavlat OTM talabalarining keyingi taqdiri nima bo‘ladi?

 

AOKAda o‘tkazilgan brifingda maʼlum qilinishicha, Oliy taʼlim, fan va innovatsiyalar vazirligi tomonidan 2023 yil 16-31 may kunlari respublikamizdagi 71 ta nodavlat oliy taʼlim tashkilotlari faoliyati o‘rganildi. O‘rganishlar natijasida Namangan viloyatidagi "NAMXU OTM" MCHJ nodavlat oliy taʼlim tashkiloti — Namangan xalqaro universitetida oliy taʼlim xizmatlarini litsenziyalash talablari va shartlariga rioya etishda qator qo‘pol qoidabuzarliklar qayd etildi.

 

“NAMXU OTM” MCHJ va vazirlik o‘rtasida ish iqtisodiy sudning 3 ta va maʼmuriy sudlarning 3 ta, jami 6 ta instansiyasida ko‘rib chiqilgan.

 

Shuningdek, “Valley innovative university” nodavlat oliy taʼlim muassasasini tekshirish jarayonida bir qator litsenziya talab va shartlari qo‘pol ravishda buzilgani aniqlangan.

 

Litsenziyasi bekor qilingan oliy taʼlim muassasalarining talabalarini boshqa oliy taʼlim tashkilotiga ko‘chirish uchun masʼuliyat Oliy taʼlim, fan va innovatsiyalar vazirligi zimmasida bo‘lib, talabalar o‘zlari istagan oliy taʼlim tashkilotiga tegishli tartibda ko‘chiriladi.

 

Xususan, Namangan xalqaro universitetining HEMIS axborot tizimiga kiritilgan 5876 nafar talabasidan o‘qishga ko‘chirish bo‘yicha ariza olish jarayoni 16 fevraldan boshlandi. 19 fevral holatiga 5148 nafar talabadan arizalar olindi.

 

Shu o‘rinda Oliy taʼlim, fan va innovatsiyalar vazirligi jurnalistlar, blogerlar va barcha ommaviy axborot vositalari vakillari uchun ochiqligini maʼlum qiladi, shuningdek tekshirilmagan yoki o‘z tasdig‘ini topmagan xabarlarni eʼlon qilish orqali aholiga noto‘g‘ri maʼlumot bermaslikka chorlaydi.