13 yoshli qizga nisbatan zo‘ravonlik ishi: jinoyat og‘irroq modda bilan qayta malakalandi
Jabrlanuvchiga Ijtimoiy himoya milliy agentligi tomonidan psixologik va yuridik yordam ko‘rsatilmoqda.
Farg‘ona viloyatining Qo‘qon shahridagi mehmonxonada 13 yoshli qizga nisbatan sodir etilgan jinsiy zo‘ravonlik yuzasidan qo‘zg‘atilgan jinoyat ishi og‘irroq modda bilan qayta malakalandi. Bu haqda Bolalar ombudsmani xabar berdi.
Ma’lum qilinishicha, 9-noyabr kuni Qo‘qon shahar prokuraturasi jinoyat ishini Jinoyat kodeksining 128-moddasidan (16 yoshga to‘lmagan shaxs bilan jinsiy aloqa qilish) 118-moddasi 4-qismiga (o‘n to‘rt yoshga to‘lmagan shaxsning nomusiga tegish) qayta malakalagan.
Hodisa 28-sentabr kuni sodir bo‘lgan. Farg‘ona viloyatida yashovchi, 2012-yilda tug‘ilgan voyaga yetmagan qiz Qo‘qon shahridagi mehmonxonada jinsiy zo‘ravonlikka uchragan.
Mazkur holat yuzasidan 29-sentyabr kuni Jinoyat kodeksining 128-moddasi 3-qismi “a” bandi bilan jinoyat ishi qo‘zg‘atilgan. Gumonlanuvchi ushlanib, 30-sentabr kuni sud qarori bilan unga nisbatan qamoqqa olish tarzidagi ehtiyot chorasi qo‘llanilgan.
Bolalar ombudsmanining ma’lum qilishicha, jabrlanuvchining ruhiy holatini tiklash va qonuniy manfaatlarini himoya qilish maqsadida Ijtimoiy himoya milliy agentligi mas’ul xodimlari tomonidan unga psixologik hamda yuridik yordam ko‘rsatilmoqda.
Hozirda jinoyat ishi bo‘yicha dastlabki tergov harakatlari davom etmoqda. Bolalar ombudsmani jabrlanuvchining protsessual huquqlari ta’minlanishini o‘z vakolatlari doirasida nazorat qilib borishini bildirgan.
