Toshkentda issiq suv nega zanglab oqmoqda? Veolia izoh berdi
Jo‘mrakdan zanglagan suv oqsa, uni qisqa muddat oqizib yuborish, suv tiniqlashmasa, boshqaruv kompaniyasiga murojaat qilish kerak.
Isitish mavsumi boshlanishi bilan Toshkent aholisi tomonidan jo‘mraklardan rangi o‘zgargan, zang aralash issiq suv oqayotgani yuzasidan murojaatlar kelib tushmoqda. Veolia Energy Tashkent bunday holatning sabablarini va muammoni bartaraf etish uchun kim mas’ul ekanini tushuntirdi.
Kompaniya ma’lumotiga ko‘ra, isitish tizimi ishga tushirilganda magistral tarmoqlar va binolarning ichki quvurlarida gidravlik sirkulyatsiya rejimi o‘zgaradi. Natijada yozgi-kuzgi mavsumdagi tanaffus davomida quvurlarda to‘planib qolgan mayda mineral cho‘kindilar va zang qoldiqlari suv bosimi ta’sirida yuvilib chiqishi mumkin.
Veolia Energy Tashkent mutaxassislari 1–7-noyabr kunlari shahar magistral issiqlik tarmoqlarida dastlabki sirkulyatsiya va yuvish ishlarini amalga oshirgan. Kompaniya magistral tarmoqlardagi suv sifati belgilangan me’yoriy ko‘rsatkichlarga keltirilganini bildirgan.
Binolarning ichki tarmoqlari uchun esa boshqaruv kompaniyalari mas’ul hisoblanadi. Isitish tizimi ishga tushirilganda ular quvurlarda turib qolgan suvni chiqarib yuborishi va tizimni magistral tarmoqlardan keladigan suv bilan to‘ldirishi kerak.
Jo‘mrakdan zanglagan suv oqsa, nima qilish kerak?
Veolia tushuntirishicha, aksariyat hollarda tik quvurda turib qolgan suvni qisqa muddat oqizib yuborish orqali uning rangi me’yoriy holatga qaytadi.
Agar suv tiniqlashmasa, boshqaruv kompaniyasi uni to‘liq tiniqlashguncha oqizib yuborishi lozim.
Boshqaruv kompaniyasi zanglagan suv to‘g‘ridan-to‘g‘ri binoga kirish nuqtasidan kelayotganini tasdiqlagan taqdirda, Veolia Energy Tashkent call-markaziga murojaat qilish mumkin. Kompaniya mutaxassislari tarmoqlar chegarasida suv parametrlarini tekshirish uchun joyiga chiqadi.
