To‘rt hududda narkotik savdosi fosh etildi: gumonlanuvchilarga jinoyat ishi ochildi
Sirdaryo, Navoiy, Samarqand va Qoraqalpog‘istonda narkotik moddalar savdosi bilan bog‘liq holatlar aniqlandi.
Davlat xavfsizlik xizmati, Ichki ishlar vazirligi, Bojxona boshqarmalari va Milliy gvardiya xodimlari hamkorligida Sirdaryo, Navoiy, Samarqand viloyatlari hamda Qoraqalpog‘istonda giyohvandlik vositalarining noqonuniy aylanmasiga qarshi tezkor tadbirlar o‘tkazildi.
Sirdaryo viloyatida internet narkodo‘konda “zakladchik” va qadoqlovchi vazifasida ishlagan, 1996 va 1998-yillarda tug‘ilgan erkak va ayolning Guliston shahridagi ijaradagi xonadoni ko‘zdan kechirildi. Natijada isitish moslamasi ichiga yashirilgan 337 gramm “gashish” aniqlandi.
Shuningdek, ular ombor sifatida foydalangan boshqa manzilda tarqatishga tayyorlangan, 65 ta kichik bo‘lakka qadoqlangan, jami 208 gramm “gashish” moddasi topildi.
Navoiy viloyatining Karmana tumanida o‘tkazilgan tezkor tadbirda “zakladka” usulida narkotik tarqatganlikda gumonlangan uch nafar shaxs ushlandi. Ulardan 20 gramm “Spays” sintetik moddasi olindi. Tezkor surishtiruv davomida gumonlanuvchilar tumandagi bir nechta yashirin joyga jami 542 gramm “Spays” moddasini joylashtirgani aniqlanib, u ham protsessual tartibda rasmiylashtirildi.
Samarqand shahrida o‘tkazilgan tadbirda parranda go‘shti mahsulotlari sotiladigan do‘kon ishchisi 492 gramm “opiy” moddasini kichik bo‘laklarga qadoqlab, keyinchalik sotish maqsadida saqlab kelgani fosh etildi.
Qoraqalpog‘iston Respublikasining To‘rtko‘l tumanida esa 1972-yilda tug‘ilgan mahalliy fuqaro ushlandi. Uning yonidagi sellofan paketdan 471 gramm “marixuana” topildi.
Tezkor tadbir davomida uning sherigi, 1964-yilda tug‘ilgan, muqaddam sudlangan shaxsning avtomobilidan 425 gramm, yashash xonadonidan esa 97 ta gugurt qutisiga joylangan, jami 1 kilogramm 175 gramm “marixuana” moddasi olindi.
Qayd etilishicha, barcha holatlar yuzasidan jinoyat ishlari qo‘zg‘atilgan. Hozirda tergov harakatlari olib borilmoqda.
