Ijtimoiy xizmatlar mahalla darajasiga tushirilmoqda

 

Yordamga muhtoj aholi vakillarini ijtimoiy himoyalash tizimi mahalla darajasiga tushirilmoqda. Xo‘sh, kutilayotgan asosiy o‘zgarishlar nima?

 

“Muruvvat” uylari va Ijtimoiy qo‘llab-quvvatlash markazlarida ijtimoiy xizmatlarni mobil va kunduzgi qatnov shaklida ko‘rsatish yo‘lga qo‘yiladi.

 

40 ta tumanda reabilitatsiya, sog‘lomlashtirish va nogironligi borlarga qaraydiganlarni o‘qitish bo‘yicha ko‘p tarmoqli ijtimoiy xizmatlar markazlari ishga tushiriladi.

 

“Temir daftar”larni yuritish to‘liq Ijtimoiy himoya agentligiga o‘tkaziladi.

 

“Saxovat va ko‘mak” jamg‘armasidan bir martalik yordam olish uchun, oilalarni “temir daftar”ga kiritish talabi bekor qilinadi.

 

Endi, nafaqa oluvchilar ro‘yxatiga, birinchi navbatda, nogironligi bor, ota-onasi yo‘q, boquvchisini yo‘qotgan, kasalligi va boshqa sababga ko‘ra uzoq muddat ishlay olmaydiganlarning oilalari kiritiladi.

 

Boshqa fuqarolarni “ijtimoiy reyestr”ga kiritishda, ularning faqat daromadi emas, balki xarajatlari ham baholanadi (yashash sharoiti, kommunal, soliq, kredit to‘lovlari va boshqalar).

 

Shuningdek, Ijtimoiy himoya agentligiga viloyat hokimlari bilan, 1 iyunga qadar barcha 9 ming 442 ta mahallada ijtimoiy xodimlar faoliyatini tashkil qilish vazifasi topshirildi (hozirda 28 ta tuman qamrab olingan).

 

Yil yakunigacha odamlarga protez vositalarini berish, nafaqa va qarovsiz qolgan bolalarga vasiylikni rasmiylashtirish, o‘zgalar parvarishiga muhtoj keksalarni yolg‘iz deb eʼtirof etish kabi 49 ta ijtimoiy xizmat mahallagacha tushiriladi.

 

1 oktyabrdan aholiga ko‘rsatiladigan barcha ijtimoiy yordamlarni “ijtimoiy karta” orqali moliyalashtirish joriy etiladi.

 

Ushbu yangiliklardan ko‘zlangan asosiy maqsad ijtimoiy himoya tizimida aniqlik, shaffoflik va adolatni taʼminlash. Toki yordam olgan inson hayotga qaytishga intilsin, o‘zini jamiyatning haqiqiy aʼzosi deb his qilsin.