28 dona iPhone 15'ni noqonuniy olib kirmoqchi bo'lganlar ushlandi
Hozirda holat yuzasidan tergovga qadar tekshiruv harakatlari olib borilmoqda.
Avtomashina saloniga va haydovchining ichki cho‘ntagiga berkitilgan telefonlarning bojxona rasmiylashtiruvidan o‘tganligini tasdiqlovchi hujjatlari bo‘lmagan.
Farg‘onada huquqni muhofaza qiluvchi organ xodimlari tomonidan o‘tkazilgan tezkor tadbir davomida "Vodil-Marg‘ilon" yo‘nalishida harakatlanayotgan fuqaro boshqaruvidagi "Lacetti" mashinasi Farg‘ona shahri Qirguli mavzesida belgilangan tartibda to‘xtatilib, xolislar ishtirokida ko‘zdan kechirildi.
Ko‘zdan kechirish natijasida, avtomashina salonining 3 ta joyiga va haydovchi kiyimlari ichiga yashirilgan, xorijda ishlab chiqarilgan, bojxona rasmiylashtiruvidan o‘tganligini tasdiqlovchi hujjatlari bo‘lmagan, umumiy qiymati 394 million so‘mlik 3 turdagi jami 28 dona iPhome 15 uyali aloqa vositalari borligi aniqlanib ashyoviy dalil tariqasida vaqtincha saqlovga olindi.
Hozirda mazkur holat yuzasidan bojxona organlari tomonidan tergovga qadar tekshiruv harakatlari olib borilmoqda.
