Vyetnam bilan o‘zaro manfaatli hamkorlik kengaytiriladi
Tanzila Narbayeva Nyu-Yorkda Vyetnam Sotsialistik Respublikasi vitse-prezidenti bilan uchrashdi.
Oliy Majlis Senati Raisi Tanzila Narbayeva Nyu-York shahrida BMT Ayollar holati bo‘yicha komissiyasining 68-sessiyasi maydonida Vyetnam Sotsialistik Respublikasi vitse-prezidenti Vo Txi An Suan bilan uchrashuv o‘tkazdi.
Ikki mamlakat o‘rtasidagi o‘zaro manfaatli hamkorlikning amaliy jihatlari muhokama qilindi.
Vo Txi An Suan Ostona shahrida bo‘lib o‘tgan Osiyoda hamkorlik va ishonch choralari bo‘yicha kengashning navbatdagi sammiti doirasida O‘zbekiston Prezidenti Shavkat Mirziyoyev bilan bo‘lib o‘tgan samarali suhbatni hamda 2022-yil oktabr oyida Toshkentda qisqa muddatli tashrif bilan bo‘lganini iliqlik bilan esladi.
Uchrashuv chog‘ida parlamentlararo munosabatlarni yo‘lga qo‘yish va rivojlantirish, taʼlimga oid va boshqa qo‘shma gumanitar dasturlarni amalga oshirish masalalariga alohida eʼtibor qaratildi.
Uchrashuv yakunida Vo Txi An Suan Samarqand shahrida bo‘lib o‘tadigan Osiyo ayollar forumida ishtirok etishga taklif etildi.
