Issiqxona keltirayotgan milliardlar
Sirdaryoda fuqaro zamonaviy usulda issiqxona tashkil etib, katta daromad topmoqda.
Sirdaryo viloyati Sayxunobod tumanida «Zarbdor nurli quyoshi» korxonasi rahbari Rahimov Tohirjon Hojimurod o‘g‘li zamonaviy usulda issiqxona tashkil etib, katta daromad topmoqda.
“Turkiya va Koreya tajribasi asosida zamonaviy gidroponika usulini qo‘llagan holda issiqxona tashkil etdik. 24 ta yangi ish o‘rni yaratib, aholi bandligini taʼminlashga ham baholi qudrat hissa qo‘shmoqdamiz. Issiqxonamiz maydoni 1 gektar 20 sotix bo‘lib, Turkiya davlatiga mansub 24 ming tub dafnis ko‘chatlarini yetishtiryapmiz.
1 tup ko‘chatdan o‘rtacha 5 kilogramm, mavsum davomida esa umumiy 120 tonna hosil olyapmiz. Ichki bozorda o‘rtacha 15 ming so‘mdan sotgan taqdirimizda ham, jami 1 milliard 800 million so‘m bo‘ladi.
Hozirda korxonamiz tomonidan yangi loyihalar yo‘lga qo‘yilmoqda. Aholi tomorqalariga 2-3 sotixli zamonaviy issiqxonalarni barpo etib, yig‘ilgan tayyor mahsulotni sotib olib, eksportini tashkil qilmoqchimiz. Shuningdek, 3 gektar bo‘sh yer maydonini olib, umumiy qiymati 900 ming AQSH dollariga teng Gollandiya usulidagi loyiha ustida ish olib borilmoqda”, deydi u.
