“Humo air” 284 ta reysni bekor qilib, yo‘lovchilarning pulini qaytarmadi
Holat yuzasidan Raqobat qo‘mitasi munosabat bildirdi.
Ijtimoiy tarmoqlarda “Humo air” mijozlarni sarson qilayotgani va ularning pullari qaytarilmayotgani haqida xabarlar tarqaldi. Raqobatni rivojlantirish va isteʼmolchilar huquqlarini himoya qilish qo‘mitasi mazkur murojaat yuzasidan rasmiy munosabat bildirdi.
Ushbu holat Raqobat qo‘mitasi tomonidan o‘rganib chiqilganda haqiqatan ham “Humo air” MCHJ tomonidan 2024 yilda 284 ta aviareyslar bekor qilingani va aviachipta xarid qilgan yo‘lovchilar pullarini qaytarib ololmayotganliklari maʼlum bo‘lgan. Bu bilan aviakompaniya O‘zbekiston Respublikasi “Isteʼmolchilarning huquqlarini himoya qilish to‘g‘risida”gi Qonunining 19 va 21-moddalari talablari buzilganligi aniqlangan.
Qo‘mita olib borgan o‘rganishlar natijasida “Humo air” MCHJga bugungi kungacha 2000 nafar yo‘lovchining murojaati qanoatlantirilgan va aviachipta uchun to‘lagan 1,5 mrld so‘m mablag‘ isteʼmolchilarga qaytarilishi taʼminlangan.
Shuningdek, 6 nafar isteʼmolchining talabiga ko‘ra, aviakompaniya o‘z hisobidan boshqa aviakompaniyadan 7 mln 498 ming 758 so‘mga chiptalarni xarid qilib topshirgan. Aviakomapaniya tomonidan parvozi amalga oshmagan qolgan yo‘lovchilarga ham pulni qaytarish choralari ko‘rilmoqda.
