Bekobodda 28 yoshli ayol o‘zini 5-qavatdan tashlab yubordi
Maʼlum bo‘lishicha, ayolning turmushi notinch bo‘lgan, eri uni vahshiylarcha kaltaklab kelgan.
Toshkent viloyatining Bekobod tumanida 28 yoshli ayol o‘zini 5-qavatdan tashlab vafot etdi.
Voqea 27-mart kuni soat 21:30 larda sodir bo‘lgan. Ikki farzandning onasi bo‘lgan N.X. yashash xonadonining 5-qavatidan o‘zini tashlab, o‘z joniga qasd qilgan.
Voqea joyiga tuman prokurori, tuman prokuraturasi tergovchisi, IIB boshlig‘i va boshqa tergov-tezkor guruhi aʼzolari chiqqan. Voqea joyini ko‘zdan kechirish davomida ayolning yashash xonadonidan uning bir dona telefon apparati olingan. Holat yuzasidan sud-tibbiy ekspertiza tayinlangan.
Yaqinlarining aytishicha, ayolning turmushi notinch bo‘lgan, eri vahshiylarcha kaltaklab kelgan. To‘qqiz yillik turmushning bor-yo‘g‘i uch yilini erinikida yashagan. Lekin shu orada uch marta himoya orderi berilgan bo‘lsa ham zo‘ravonga biror chora ko‘rilmagan.
Bekobod tuman prokuraturasi tomonidan voqea yuzasidan tergovga qadar tekshiruv o‘tkazilmoqda.
