Qozog‘istondagi YTHda halok bo‘lganlar jasadi olib kelindi
Mahalliy hokimliklar va marhumlarning oila a'zolari tomonidan dafn marosimlarini o‘tkazish bo‘yicha tayyorgarlik ishlari olib borilmoqda.
Qozog‘iston Respublikasi Aktobe oblasti Algin rayoni hududida ro‘y bergan yo‘l-transport hodisasi oqibatida vafot etgan O‘zbekiston fuqarolari vataniga qaytarildi. Bu haqda FVV maʼlum qildi.
O‘zbekiston Respublikasi Prezidenti Shavkat Miromonovich Mirziyoyevning topshiriqlariga asosan, Hukumat farmoyishi bilan Favqulodda vaziyatlar vaziri o‘rinbosari boshchiligida tashkil etilgan maxsus komissiya kecha, 4 aprel kuni Qozog‘iston Respublikasi Aktobe oblastiga yetib bordi.
Maxsus komissiya aʼzolari Qozog‘iston Respublikasining masʼul idoralari rahbarlari bilan uchrashib, belgilangan tashkiliy va amaliy tadbirlarni hamkorlikda olib borishdi. Shundan so‘ng O‘zbekiston Mudofaa vazirligining maxsus bortida yo‘l-transport hodisasi oqibatida vafot etgan fuqarolar Qozog‘iston Respublikasidan 5 aprel kuni soat 03:00 larda Surxondaryo viloyatidagi “Termiz” xalqaro aeroportiga olib kelindi.
Qozog‘iston Respublikasi masʼul idoralari yuzaga kelgan baxtsiz hodisa oqibatida vafot etganlarni O‘zbekistonga olib kelinishida yaqindan ko‘maklashdilar.
Favqulodda vaziyatlar, Mudofaa, Ichki ishlar, Tashqi ishlar, Sog‘liqni saqlash va Transport vazirliklari hamkorligida 8 nafar vafot etgan fuqarolarning jasadlari yashash manzillariga yuborilgan.
