Jizzaxda bolani kaltaklagan o‘qituvchi ishdan haydaldi
Bundan tashqari, unga nisbatan jarima jazosi tayinlangan.
Jizzax viloyatining Zomin tumanida o‘quvchini urgan o‘qituvchi ishdan bo‘shatildi. Bu haqda Bolalar ombudsmani xabar berdi.
Qayd etilishicha, Jizzax viloyati Zomin tumanida yashovchi D.M. dan murojaat kelib tushgan. Murojaatda u 2023 yilning 26 dekabr kuni maktab o‘qituvchisi S.M. voyaga yetmagan farzandi O.T.ning yuz qismiga bir necha bor tarsaki urib, turli nomaqbul so‘zlar bilan haqorat qilganini bildirgan.
Jizzax viloyati Zomin tumani MMT bo‘limining tegishli mutaxassislari tomonidan holat o‘rganilib, mazkur umumiy o‘rta taʼlim maktab direktorining buyrug‘iga asosan S.M. bilan tuzilgan mehnat shartnomasi bekor qilingan.
Shuningdek, joriy yilning 23 yanvardagi jinoyat ishlari bo‘yicha Zomin tuman sudida o‘qituvchining harakatlariga huquqiy baho berilib, S.M. ga nisbatan MJtKning 41-moddasi (Haqorat qilish) va 52-moddasini (Yengil tan jarohati yetkazish) sodir etgan deb topilib, unga nisbatan bazaviy hisoblash miqdorining 20 barobari miqdorida jarima jazosi belgilangan.
