Muftiy Islom olami uyushmasi Oliy kengashiga aʼzo bo‘ldi
Bu haqda Saudiyada o‘tgan yig‘ilishda qaror qilingan.
Bugun, 23-aprel kuni Saudiya Arabistoni poytaxtida eng nufuzli tashkilot hisoblangan Islom olami uyushmasi Oliy Kengashning 46-yig‘ilishi bo‘lib o‘tdi.
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Islom olami uyushmasi Oliy Kengashi aʼzoligiga qabul qilinganlari to‘g‘risida ushbu yig‘ilishda qaror qilindi. Ushbu aʼzolik Muftiy hazratlari faoliyatlari davomidagi to‘rtinchi yirik tashkilotga aʼzo bo‘lishlaridir. Bular – Xalqaro musulmon ulamolari kengashi (Qatar), Musulmon donishmandlar kengashi (BAA), Islomiy fiqh akademiyasi (Saudiya Arabistoni) va Islom olami uyushmasi Oliy Kengashi (Saudiya Arabistoni) kabilardir.
Anjumanda butun jahonda tinchlik-osoyishtalikni qaror toptirish, xususan, Falastin va G‘azo mintaqasidagi vaziyatni tinch yo‘l bilan hal etish, islom ummati birligiga erishish, ayrim musulmon mamlakatlaridagi noxush holatlarni isloh qilish, Rohinja musulmonlarining haq-huquqlarini himoya qilish, diniy ramzlarning tahqirlanishi, ayniqsa, Qurʼoni karimni yoqish kabi holatlarga mutlaqo yo‘l qo‘ymaslik va islomofobiya xatti-harakatlarining oldini olish kabi o‘ta muhim masalalar muhokama qilindi.
