Chiroqchida yangi oilaviy poliklinika ochildi
U 33 ming nafardan ortiq aholiga xizmat ko‘rsatadi.
Chiroqchi tumanidagi Langar, Tarag‘ay, Quruqsoy qishloqlari tuman markazidan 50 kilometr uzoqlikda joylashgan. Sohibqiron Amir Temur bobomizning otasi nomi bilan bog‘liq ushbu qadimiy tarixga ega qishloqlarning tabiati juda go‘zal. To‘rt tomoni purviqor tog‘lar bilan o‘ralgan so‘lim go‘sha. Bu yerda to‘rt faslning ham o‘zgacha tarovati bor. Ayniqsa, bahor faslida hudud nihoyatda xushmanzara manzilga aylanadi. Ushbu hududdagi Tarag‘ay turizm qishlog‘i maqomini olgan bo‘lib, keyingi yillarda uning iqtisodiy ijtimoiy holati o‘zgarib bormoqda. Yangi yo‘llar, infrastruktura tizimlari yaratilmoqda.
Hududda 4 ta mahallaga birlashgan o‘ndan ziyod qishloq mavjud bo‘lib, ularda 33 ming nafardan ziyod aholi istiqomat qiladi.
Ushbu aholi vakillari shu kunga qadar tibbiy xizmat sifati pastligidan qiynalib kelardi. Boisi hududda birorta ham tibbiyot muassasasi yo‘q edi. Biror xastalik bo‘lganda olis yo‘l bosib, Qalqama shifoxonasiga yoki undan ham uzoq tuman markazidagi shifoxonalarga qatnashga majbur edi. Ayniqsa, qish- qirovli kunlarda ushbu holat aholi uchun juda noqulaylik tug‘dirardi.
Nihoyat aholining uzoq yillik orzulari amalga oshiriladigan bo‘ldi. 2,5 milliard so‘mdan ziyod mablag‘ evaziga “Langar” mahallasida “Tarag‘ay” oilaviy poliklinikasi qurilib, foydalanishga topshirildi.
33 ming nafardan ortiq aholiga xizmat ko‘rsatadigan ushbu shifo maskanida 50 nafardan ziyod tibbiyot xodimi faoliyat ko‘rsatmoqda. Kunduzgi statsionar davolanish uchun 25 ta o‘rin aholi xizmatida.
Oilaviy poliklinikaga yaqin qishloqlar aholisining uzoq yillik orzulari ushaldi. Endi statsionar davolanish uchun tuman markaziga qatnashning hojati yo‘q. Shu yerning o‘zida aholiga sifatli tibbiy xizmat ko‘rsatish uchun barcha sharoit va imkoniyat yaratildi. Tibbiyot maskanida hozircha 5 nafar oliy maʼlumotli shifokor ishlayapti. Kelgusida ularning soni yana-da ko‘payadi.
Oilaviy poliklinikaning tantanali ochilish marosimida viloyat hokimi Murotjon Azimov va keng jamoatchilik vakillari ishtirok etdi.
