Semizlikdan qutulmoqchimisiz?

Kam harakatlik, genetik omillar, endokrin kasalliklar, noto‘g‘ri ovqatlanish yoki psixologik buzilishlar hamda stresslarga beriluvchanlik sababli so‘nggi yillarda dunyo miqyosida ortiqcha vazn va semizlik jiddiy muammoga aylandi.

 

Jahon sog‘liqni saqlash tashkilotining statistik maʼlumotlariga ko‘ra, yurak qon-tomir kasalliklari yer yuzida o‘limning asosiy sababchisi bo‘lib, aynan semizlik uning rivojlanishiga olib keladi.

 

Xo‘sh, bu muammoning oldini olish uchun nima qilish lozim?

 

Salomatlik va strategik rivojlanish instituti bo‘lim boshlig‘i, tibbiyot fanlari nomzodi Feruza Tohirova sog‘lom ovqatlanishning muhim qoidalari haqida aytib o‘tdi.

 

✅ 1-qoida. Kunda 3 mahal asosiy ovqatlanish shart:

 

Nonushta;

 

Tushlik;

 

Kechki ovqat.

 

Asosiy taomni imkon boricha, qorin ochmasdan bir vaqtda isteʼmol qilish kerak. Shuningdek, asosiy ovqatdan avval 1 stakan suv ichish lozim.

 

✅ 2-qoida.

 

Suv ichgandan so‘ng va asosiy ovqatdan avval xom sabzavotlar (pomidor, bodiring, karam, rediska, bulg‘or qalampiri, qizil sabzi, turp, salat bargi va boshqa ko‘katlar)ni alohida yoki salat ko‘rinishida isteʼmol qiling. Salatga uyda tayyorlangan mayonez, qatiq/sho‘r bo‘lmagan suzma yoki zaytun, kungaboqar moyi va limon sharbati qo‘shish mumkin.

 

✅ 3-qoida.

 

Asosiy ovqatdan so‘ng 2 soat oralig‘ida 30 daqiqagacha jismoniy yuklama (1 soniyada 2 qadam tashlab piyoda yurish yoki velosiped haydash yoki shunga o‘xshash jismoniy faollik) bo‘lishi shart.

 

✅ 4-qoida.

 

Ho‘l mevalarni kunning birinchi yarmida asosiy ovqatdan 2 soat keyin isteʼmol qilish maqsadga muvofiq.

 

✅ 5-qoida.

 

Agarda uyquga ketishdan avval qorin ochsa, suvda qaynatilgan 2 ta tuxum oqi yoki 50-100 gramm atrofida oq go‘sht (tovuq, kurka to‘sh go‘shtlari) yoki yarim stakan yog‘siz qatiq/kefir isteʼmol qilish mumkin.