Toshkentni yana “suv bosdi”
Hokimlik holat bo‘yicha maʼlumot berdi.
Bugun, 5-may kuni poytaxtda kuzatilgan kuchli yog‘ingarchilik sabab shaharning ayrim hududlariga suv to‘plandi.
Hokimlik xabariga ko‘ra, Yashnobod tumanining “Mahtumkuli” ko‘chasidagi ariqlarda va avtomobil yo‘lida suv to‘planishi holati kuzatilgaan, mazkur holat haydovchilarga va ayniqsa, piyodalarga katta noqulaylik tug‘dirgan. Shahar va tuman kommunal xizmatlari tomonidan suv to‘planishi holati bartaraf etilgan va avtomobil yo‘li normal holatga keltirilgan.
Qo‘shimcha qilinishicha, ushbu vaziyatning yagona sababi – chiqindilarning belgilangan joylarga emas, balki yo‘llarga va ariqlarga tashlab ketilishi.
“Tumanimiz obodligi, qulayligi, tozaligiga befarq bo‘lmaylik! Tumanimizni sarishta saqlash bizning, sizning – barchamizning masʼuliyatimiz. Kelajakda bunday holatlar qaytarilmasligi uchun chiqindilarni faqat belgilangan joyga tashlashingizni, bu orqali, tumanimiz ozodaligiga o‘z hissangizni qo‘shishingizni so‘raymiz!”, deyiladi tuman hokimligi xabarida.
