Ko‘kdalada tarvuz pishdi
Hosilning dastlabki 1 tonnasi bozorga chiqarildi.
Ko‘kdalalik dehqonlar yildan-yilga tarvuzchilikda samarador texnologiyalarni qo‘llamoqda va bu ijobiy natijalar bermoqda. Kuni kecha Ko‘kdala tumani “Jamshid Jumanazarov” fermer xo‘jaligida yetishtirilayotgan tarvuzlar pishdi.
Joriy yilda 25 gektar maydonga tarvuz ekilgan, shundan dastlabki 1 tonnasi mahalliy bozor rastalariga yetkazib berildi. Mavsumda tarvuzning har gektaridan 30 tonnadan, qariyb 750 tonna hosil olishni reja qilganmiz. Yetishtirilgan hosil asosan eksportga yo‘naltiriladi – deydi, tadbirkor S. Jumanazarov.
Ko‘kdalalik dehqonlar ham tarvuzchilikda o‘z tajribalarini yil sayin oshirmoqda. Nafaqat serhosil navlar bo‘yicha, balki uni sug‘orish, yetishtirish bo‘yicha ham yangicha uslublar joriy qilinmoqda.
Darhaqiqat, bir necha yillar oldin faqat chorvachilik bilan kun ko‘rib, minglab gektar maydonlardan yaylov sifatida foydalangan ko‘kdalaliklar hozirgi kunda dehqonchilik ayniqsa, tarvuz qovun yetishtirishda odimlab ketishdi. Ularning bugungi faoliyati va erishayotgan natijalari bunga yaqqol misol.
