Xorazmlik erkak xotinini bolta bilan o‘ldirib qo‘ydi
Ular salkam 50 yildan beri birga yashab kelayotgan bo‘lgan.
Sud hujjatlariga ko‘ra, hodisa 2023 yil 16 dekabr kuni sodir bo‘lgan. 71 yoshli sudlanuvchi erkak A.X. o‘sha kuni yarim tunda uyg‘onib, 72 yoshli ayoliga qon bosimi ko‘tarilgani sabab o‘zini yomon his qila boshlaganidan shikoyat qilgan.
Xotini unga aytgan dorilarini topib berib, tibbiy yordam ko‘rsatganida, hech bir sababsiz sudlanuvchi ayoliga sehr-jodu qilib kelayotganligini, shuning uchun kechalari uxlayolmasligini aytib, u bilan o‘zaro janjallashgan. Janjal vaqtida erkak yotoqxonasida isitish pechi yonida turgan bolta bilan 49 yildan beri yashab kelayotgan turmush o‘rtog‘ining bosh qismiga 17 marotaba va chap qo‘l uchinchi barmog‘iga bir marotaba urgan. Oqibatda, ayol og‘ir tan jarohati olib, voqea joyida vafot etgan.
Qotillikdan so‘ng ayblanuvchi o‘z joniga qasd qilmoqchi bo‘lgan, biroq huquq-tartibot idoralari xodimlari kelib, unga birinchi tibbiy yordam ko‘rsatishga muvaffaq bo‘lishgan.
Sud erkakni Jinoyat kodeksining 97-moddasi (qasddan odam o‘ldirish) bilan aybdor deb topib, 10 yil muddatga ozodlikdan mahrum qilish jazosini tayinladi. Jazo umumiy tartibli koloniyalarda o‘talishi belgilandi.
