Qashqadaryoda kollej binosi pillaxonaga aylantirildi
Holat yuzasidan masʼullar izoh berdi.
Ijtimoiy tarmoqda Qashqadaryo viloyatining Qamashi tumanidagi kasb-hunar kollejlaridan birining binosida pilla boqilayotgani aytilgan video tarqaldi.
Holat yuzasidan rasmiylarning izoh berishicha, taʼlim muassasasi Suv xo‘jaligi vazirligiga qarashli Suv xo‘jaligi va melioratsiya kolleji hisoblanadi. U 750 o‘ringa mo‘ljallangan. Ammo ayni kunda binoda 176 nafar o‘quvchi o‘qiydi. Aksariyat xonalar bo‘sh va jihozsiz bo‘lgani uchun bo‘sh turgan xonalardan foydalanib, daromad qilish, belgilangan rejani bajarish maqsad qilingan.
"Pilla qurtini yordamchi xo‘jalikdagi xodimlarimiz parvarish qiladi. O‘quvchilar tahsil oluvchi bino bu binodan alohida joylashgan bo‘lib, pilla boqish dars jarayonlariga xalal bermaydi", — deydi muassasa direktori.
Taʼkidlanishicha, taʼlim dargohi joriy mavsumda 168 kilo pilla topshirishi kerakligi belgilangan.
