Farg'onada pichoqlangan shaxsning hayoti saqlab qolindi
Hozirda holat yuzasidan tergov harakatlari olib borilmoqda.
Ijtimoiy tarmoqlarda yo‘lda turgan odam pichoqlangani haqidagi xabar tarqaldi.
Joriy yilning 21-may kuni, 2006 y.t. Marg‘ilon shaharda yashovchi fuqaro S.T. shaharning B.Marg‘iloniy ko‘chasida Yangi bog‘i MFY da yashovchi 2000 y.t fuqaro A.A.ni o‘tkir tig‘li jism bilan o‘ng orqa va yuz sohasiga urib, hayot uchun xavfli bo‘lgan tan jarohati yetkazgan.
Fuqaro A.A. hodisa joyidan qochib ketishi natijasida, S.T. jinoiy harakatlarini oxiriga yetkaza olmasdan, hodisa joyidan noma’lum tomonga yashiringan. Shifokorlar tomonidan o‘z vaqtida ko‘rsatilgan tibbiy muolajalar natijasida A.A.ning hayoti saqlanib qolingan.
Hozirda shahar prokuraturasi tomonidan holat yuzasidan JKning 25,97-moddasi 1-qismi bilan jinoyat ishi qo‘zg‘atilib, gumonlanuvchi S.T. JPKning 221-moddasi tartibida ushlangan. Marg‘ilon shahar prokuraturasi tomonidan tergov harakatlari olib borilmoqda.
