Atom energetikasi, migratsiya, xavfsizlik: Mirziyoyev va Putin qator masalalarni muhokama qildi
Ko‘ksaroyda O‘zbekiston va Rossiya prezidentlari tor doirada uchrashuv o‘tkazdi.
Prezident matbuot xizmatining xabar qilishicha, suhbat avvalida Shavkat Mirziyoyev oliy martabali mehmonni samimiy qutlar ekan, Rossiya prezidenti qayta saylanganidan so‘ng ilk xorijiy tashriflaridan birini aynan O‘zbekistonga amalga oshirayotganini alohida taʼkidladi.
Uchrashuvda O‘zbekiston — Rossiya keng qamrovli strategik sheriklik va ittifoqchilik munosabatlarini yana-da rivojlantirish va chuqurlashtirish masalalari ko‘rib chiqildi.
Tashrifga tayyorgarlik doirasida parlament aʼzolarining uchrashuvlari, siyosiy maslahatlashuvlar, Innoprom ko‘rgazmasi, ikki mamlakat yetakchi muhandislik-texnik oliy o‘quv yurtlari rektorlari va nufuzli tibbiyot muassasalari rahbarlarining anjumanlari samarali o‘tgani, Toshkentda Rus sanʼati haftaligi tadbirlari davom etayotgani taʼkidlandi.
Savdo-iqtisodiy hamkorlikning o‘sib borayotgan surʼati mamnuniyat bilan qayd etildi. O‘zaro tovar ayirboshlash va Rossiyadan investitsiyalar hajmi ko‘paymoqda, sanoat kooperatsiyasi rivojlanmoqda. Qo‘shma loyihalar portfeli 45 milliard dollarni tashkil etdi.
Yetakchi korxonalarning qo‘shma loyihalarini qo‘llab-quvvatlash maqsadida qo‘shma investitsiya platformasini ishga tushirish yuzasidan kelishuvga erishildi. Prezidentlar hududlararo hamkorlikni yana-da rivojlantirish muhimligini taʼkidladi.
Shuningdek, yetakchilar energetika, shu jumladan, atom energetikasi, qishloq xo‘jaligi, innovatsiyalar, migratsiya, xavfsizlik va boshqa sohalarda o‘zaro manfaatli hamkorlikni rivojlantirish masalalarini atroflicha muhokama qildi.
Ko‘p qirrali madaniy-gumanitar almashinuv rivojlanayotganiga yuqori baho berildi. Tashrif davomida Madaniy hamkorlik dasturi qabul qilinadi.
Taʼlim va muhandis kadrlarni tayyorlash sohalaridagi hamkorlikka alohida eʼtibor qaratildi. O‘zbekistonda Bauman nomidagi Moskva texnika universiteti va Butunrossiya tashqi savdo akademiyasi filiallarini ochish bo‘yicha kelishuvlarga erishildi.
Davlat rahbarlari tomonlarni qiziqtirgan mintaqaviy va xalqaro ahamiyatga molik masalalar yuzasidan ham fikr almashdi.
