Saida Mirziyoyeva: “Islohotlar yo‘lidan aslo chekinmaymiz”
Prezident yordamchisi Saida Mirziyoyeva Jahon savdo tashkiloti, Jahon banki va Xalqaro valyuta jamg‘armasi ko‘magida o‘tkazilgan konferensiyada O‘zbekiston iqtisodiy taraqqiyot, ijtimoiy sohalar rivoji va qonun ustuvorligini taʼminlashga qaratilgan islohotlardan ortga chekinmasligini taʼkidladi.
5-iyun kuni Toshkentda Jahon savdo tashkiloti, Jahon banki va Xalqaro valyuta jamg‘armasi ko‘magida konferensiya bo‘lib o‘tdi. Prezident yordamchisi Saida Mirziyoyevaning so‘zlariga ko‘ra, bu tadbirda O‘zbekistonning JSTga qo‘shilish yo‘lidagi shahdam qadamlari yana bir bor namoyon bo‘lgan.
“Biz iqtisodiy taraqqiyotni qo‘llab-quvvatlash, ijtimoiy himoya, sog‘liqni saqlash hamda taʼlim sohalarini takomillashtirish, shuningdek, qonun ustuvorligini taʼminlashga qaratilgan islohotlarni davom ettirishga qatʼiy kirishganmiz. Biz bu yo‘ldan aslo chekinmaymiz, yurtimizning taraqqiyot manzili – aynan shu.
Bunday maqsadlarga faqat sifatli investitsiyalar va qo‘shimcha qiymat yaratishning global zanjirlariga bog‘lanib erishish mumkin.
JST rahbariyatining bizni bu qadar qo‘llab-quvvatlashi va ishonch bildirishi yuksak bahoga loyiq”, — dedi Saida Mirziyoyeva.
