Qozog‘istonda avtomobil yonib ketdi
Lada Largus rusumli avtomashina ichida 3 nafar O‘zbekiston fuqarolari bo‘lgan.
Qozog‘istonning Atirau viloyatida ichida O‘zbekiston fuqarolari bo‘lgan Lada Largus avtomobilida yong‘in chiqdi.
Voqea 8-iyun kuni soat 11:45 da Atirau viloyati, Makat tumani hududidan o‘tuvchi Atirau-Aqto‘be respublika ahamiyatiga ega avtomobil yo‘lining 31-kilometrida sodir bo‘lgan.
Rossiya—O‘zbekiston yo‘nalishida harakatlanib ketayotgan O‘zbekiston davlat raqamiga ega bo‘lgan Lada Largus rusumli avtomashinada sodir bo‘lgan yong‘in soat 12:50 da to‘liq bartaraf etilgan.
Avtomobil ichida uch nafar O‘zbekiston fuqarosi bo‘lgan. Yong‘in oqibatida Lada Largus mashinasi haydovchisi jarohat olmagan, qolgan ikki nafar yo‘lovchi har xil darajadagi kuyish jarohati bilan Atirau viloyat kasalxonasiga yotqizilgan.
Haydovchi va jarohat olganlarning shaxslariga aniqlik kiritilgan va ular bilan doimiy aloqa o‘rnatilgan. Ushbu holat Bosh konsulxona nazoratiga olingan.
