Farg‘onalik yigit onasining barmoqlarini kesib tashladi
Hozirda unga nisbatan jinoiy ish ochilgan.
Farg‘ona viloyatining Marg‘ilon shahrida ruhiy nosog‘lom o‘g‘il onasining qo‘lini kesib tashladi. Bu haqda “Zamon” informatsion dasturida xabar berildi.
Onaning so‘zlariga ko‘ra, o‘g‘lining ahvoli yomon holatga kelib, ko‘ziga tez-tez bir nomaʼlum narsalar ko‘rinadigan bo‘lib qolgan. Shundan so‘ng, ona o‘g‘lini bir necha marotaba shifoxonaga olib borib, maʼlum vaqt davolatgan. O‘sha kuni ham uning ko‘ziga bir nimalar ko‘ringan va onasini kaltaklab ketgan. Shuningdek, o‘g‘il qo‘lidagi qaychi bilan onasining qo‘llariga jarohat yetkazgan.
Onasiga jarohat yetkazgandan so‘ng, o‘g‘il qo‘lida pichoq bilan ko‘chaga chiqib ketgan. U Toshloq tumanidan Marg‘ilon shahridagi bozorga kelgan. So‘ngra, mato sotiladigan joyda o‘ziga shikast yetkazgan.
Hozirda yigitga nisbatan Jinoyat Kodeksining 104-moddasi (Qasddan badanga og‘ir shikast yetkazish) 2-qismi “L” bandi bilan jinoyat ishi qo‘zg‘atilib, dastlabki tergov ishlari olib borilmoqda.
