Zomindan 6 tonnadan ortiq chiqindi chiqdi
100 ga yaqin ko‘ngilli tomonidan hududda plogging aksiyasi o‘tkazildi.
Zomin tumanida viloyat Ekologiya, atrof-muhitni muhofaza qilish va iqlim o‘zgarishi boshqarmasi tomonidan viloyat Yoshlar ishlari boshqarmasi hamda Zomin milliy tabiat bog‘i bilan hamkorlikda plogging aksiyasi tashkil etildi.
Plogging aksiyasini o‘tkazish uchun tumanning Duoba qishlog‘iga kiraverishdagi tog‘ yo‘li tanlab olingan. Ushbu tog‘ orqali o‘tgan yo‘llar Zomin milliy tabiat bog‘iga olib boradigan yagona yo‘l hisoblanadi, dam olish maqsadida kelayotgan aholi asosan shu yo‘ldan harakatlanadi. Aksariyat kishilar avtotransport vositalaridan turli chiqindilarni ushbu yo‘lga uloqtirishadi va tabiatga zarar yetkazishadi.
Plogging davomida 100 ga yaqin ko‘ngillilar tomonidan to‘plangan 6 tonnadan ziyod maishiy chiqindilar 2 ta maxsus transport vositasi yordamida chiqindi poligoniga joylashtirildi. Hududdagi maxsus ogohlantiruvchi belgilar qayta taʼmirlandi.
