Metroda sovitish tizimi ishlamayaptimi?

Ijtimoiy tarmoqlarda metropolitenning yer usti yo‘nalishidagi harakat tarkiblarida sovitish tizimi ishlamayotgani haqida xabarlar joylanmoqda. Holat yuzasidan “Toshkent metropoliteni” DUK rasmiy munosabat bildirdi.

 

Qayd etilishicha, “Yer usti xalqa yo‘li” yo‘nalishida harakatlanayotgan harakat tarkiblarining sovitish tizimi bilan bog‘liq kamchiliklarni bartaraf etish maqsadida maxsus ishchi guruh tuzilgan. Ishchi guruh tarkibiga Rossiya Federatsiyasidan ham 15 dan ziyod soha mutaxassislari jalb etilgan. Ushbu mutaxassislar tomonidan doimiy ravishda tizimli taʼmirlash va tekshiruv ishlari olib borilmoqda. 

 

Hozirgi vaqtda “Yer usti xalqa yo‘li” yo‘nalishida 10 ta harakat tarkibi harakatlanmoqda va shundan 8 tasi joriy yilda xarid qilingan poyezdlar bo‘lib, ularning sovitish tizimi havo harorati +50 daraja issiqqacha belgilangan norma bo‘yicha ishlash imkoniyatiga ega. 

 

Bundan tashqari, yana boshqa mavjud 2 ta harakat tarkiblari o‘tgan yillar davomida olib kelingan bo‘lib, asosan yerosti metro bekatlarida harakatlanishiga mo‘ljallangan hamda ularning sovitish tizimi harorat +40 darajagacha bo‘lgan issiqda ishlashga mo‘ljallangan. 

 

Shu sababli jalb etilgan malakali mutaxassislar tomonidan bu harakat tarkiblarining sovitish tizimlarining uskunalari modernizatsiya qilinmoqda. Amalga oshirilayotgan ishlar natijasida yuzaga kelayotgan bu kabi kamchiliklar yaqin kunlar ichida to‘liqligicha bartaraf etilishi maʼlum qilingan.