Ish haqi va nafaqa pullarining 3,7 milliard so‘mi talon-tаroj qilingan
Bu haqida Bosh prokuratura maʼlum qildi.
AOKAda o‘tkazilgan brifingda Bosh prokuratura axborot xizmati rahbari Hayot Shamsuddinov Bosh prokurorning mamlakatimiz aholisiga yo‘llagan murojaatida qayd etilgan masalalar ijrosi yuzasidan amalga oshirilgan ishlar haqida maʼlumot berdi:
O‘tkazilgan o‘rganishlarga ko‘ra, 3087 ta yangi ish o‘rni hisobotlarga qo‘shib yozilgani aniqlanib, aybdor shaxslar tegishli javobgarlikka tortildi.
Ish haqi va nafaqa pullarining 3,7 milliard so‘mi talon-tаroj qilingan. Mazkur holat bo‘yicha 34 ta jinoyat ishi qo‘zg‘atildi.
Shuningdek, xorijiy investorlar faoliyatida yuzaga kelgan 1644 ta muammo ijobiy hal etildi.
Prokuratura organlarining aralashuvi bilan qarzdorliklarning 6,4 trln. so‘mi amalda undirildi, 5,7 trillion so‘mlik kreditlar bo‘yicha garovdagi mulklarning sotuvga chiqarilishi taʼminlandi. Bundan tashqari, 1,2 trillion so‘mlik ijro hujjatlari bo‘yicha undiruv qarzdorlarning ish haqiga qaratildi.
O‘tkazilgan nazorat tadbirlarida kredit mablag‘larining 1,5 trillion so‘mi talon-toroj qilinganligi aniqlanib, bank va mijoz korxonalar rahbarlariga nisbatan 540 ta jinoyat ishi qo‘zg‘atildi.
