Farg‘onada fuqaro IIB xonasida hushini yo‘qotgani aytilmoqda
Holat yuzasidan rasmiy munosabat bildirildi.
Ijtimoiy tarmoqda Farg‘ona viloyati Rishton tumanida IIB xonasiga olib kirilgan fuqaro hushini yo‘qotib, jonlantirish bo‘limiga yotqizilgani haqida xabar tarqalmoqda.
Maʼlum bo‘lishicha, 4 iyul kuni Rishton tumanining “Gumbaz” mahallasida fuqaro R.M. Sobalt avtomashinasida qarama-qarshi yo‘nalishda harakatlanib, “To‘xtash taʼqiqlanadi” yo‘l belgisi taʼsir doirasiga avtomashinani qo‘ymoqchi bo‘lgan. Shunda IIO xodimlari unga huquqbuzarligini tushuntirmoqchi bo‘lgan.
Biroq R.M. xodimlarning qonuniy talabini bajarmasdan, haqorat qilib, transport vositasini shu yerda turgan fuqarolar va IIB xodimlari ustiga harakatlantirgan. Shundan so‘ng huquqbuzarlik sodir etayotgan shaxs zararsizlantirilib, majburiy tarzda IIO tayanch punktiga olib borilgan. Tayanch punktiga uning akasi M.R. ham kelib, baqir-chaqir qilib, xodimlarga qarshilik ko‘rsatgan.
Shu payt R.M.ning tutqanog‘i tutib o‘zini yo‘qotgan. Unga tez tibbiy yordam ko‘rsatilib, uyiga javob berilgan.
Tibbiy ko‘rik jarayonida fuqaroga jarohat yetkazilgan holat aniqlanmagan. Hozirda fuqaro R.M. va akasi M.R.ga nisbatan MJtKning 183, 194, va 195-moddalari tartibida hujjatlar rasmiylashtirilib qonuniy chora ko‘rish uchun sudga yuborilgan.
Xodimlarning harakatlariga huquqiy baho berish uchun xizmat tekshiruvi tayinlangan.
