Aeroportda 58 mln so‘mlik tilla to‘xtatib qolindi
Yo‘lovchi ularni yashirincha olib o‘tmoqchi bo‘lgan.
Bugun, 10 iyul kuni Istanbul — Toshkent yo‘nalishidagi reysda uchib kelgan va “yashil” yo‘lak orqali harakatlangan yo‘lovchi H.S.ning o‘zini tutishi bojxona xodimlarining eʼtiborini tortgan.
Shundan so‘ng fuqaroning yuklari bojxona ko‘rigidan o‘tkazilgan. Uning 1 dona qora rangli qo‘l sumkasi ichidan bojxona nazoratiga taqdim etilmagan, og‘zaki so‘rovda maʼlum qilinmagan 15 gramm oq rangli metalldan yasalgan, oq rangli toshlar bilan bezatilgan zargarlik buyumlari aniqlangan.
Bundan tashqari, yo‘lovchi qo‘lida ushlab turgan poliyetilen paket bilan o‘ralgan antiperspirant ichiga berkitilgan umumiy og‘irligi taxminan 61 gramm bo‘lgan sariq rangli metalldan yasalgan zargarlik buyumlari borligi maʼlum bo‘lgan.
Aniqlangan zargarlik buyumlarining muqobil manbalarda belgilangan qiymatiga asosan taxminiy narxi 58 565 000 so‘mni tashkil etgan.
Hozirda holat yuzasidan surishtiruv harakatlari olib borilmoqda.
