Toshkentdagi xususiy bog‘chada tarbiyachi bolani urib, haqoratladi
Bu haqida Bolalar ombudsmani xabar berdi.
Toshkentdagi xususiy bog‘chalardan birida tarbiyachi bolani urib, haqoratladi.
Maʼlum qilinishicha, bolalar ombudsmaniga Toshkent shahrida yashovchi I.N. va B.N. (ota-ona) murojaat qilgan. Ular o‘z murojaatida 2021 yilda tug‘ilgan farzandi xususiy maktabgacha taʼlim muassasasida tarbiyalanishini, 29 iyun kuni navbatchi tarbiyachi Sh.K. (ayol) farzandini urib, haqoratlaganini bildirgan.
Aytilishicha, ota-ona holat yuzasidan muassasa mudirasiga murojaat qilib, videotasvir nusxasini olmoqchi bo‘lganida mudira tomonidan ruxsat berilmagan va tarbiyachiga nisbatan hech qanday chora ko‘rilmagan.
Bolalar ombudsmanining Maktabgacha va maktab taʼlimi vazirligiga so‘rovi asosida mazkur holat vazirlik mutasaddilari tomonidan o‘rganildi. O‘rganish natijasida bog‘cha tarbiyachisi Sh.K.ga nisbatan hayfsan intizomiy jazo chorasi qo‘llanildi.
Shuningdek, muassasaning keyingi faoliyati davomida bolalarga tazyiq holatlariga yo‘l qo‘ymaslik ustidan vazirlik tizimli nazorat qilishi bildirildi.
