Islom sivilizatsiyasi markazi xalqaro tashkilotlar bilan memorandumlar imzoladi
“Imzolangan memorandumlar yangi kashfiyotlar uchun xizmat qilishiga ishonaman”, dedi markaz direktori Firdavs Abduxalikov.
“Buyuk ajdodlar merosi – III Uyg‘onish davri poydevori” VIII xalqaro Kongressi doirasida O‘zbekistondagi Islom sivilizatsiyasi markazi qator xorijiy va xalqaro tashkilotlar bilan memorandumlar imzoladi.
Xususan, “Al-Furqon” Islom merosi fondi menedjeri, WOSCU kengashi aʼzosi, doktor Sali Shahsivari, Rossiya islom instituti rektori, Rossiya Federatsiyasi Musulmonlar idorasi raisining birinchi o‘rinbosari Damir Muxetdinov, Fransiyaning Arab dunyosi instituti ko‘rgazmalar direktori Natali Bondil, Qohira Islom sanʼati muzeyi direktori dr.Ahmed Seyam, Korfu Osiyo sanʼati muzeyi direktori Despina Zernioti, Islom tadqiqotlar markazi rahbari dr.Murtaza Bedir, Qozog‘iston tarix va etnologiya instituti rektori Ziyabek Kabuldinov bilan imzolangan memorandum kelgusidagi hamkorlikning asosi bo‘lib xizmat qilishi shubhasizdir.
“Ushbu imzolangan memorandumlar do‘stona aloqalar, hamkorlikdagi ilmiy izlanishlar, yangi kashfiyotlar uchun xizmat qilishiga ishonaman. Shuningdek, bu hujjat Yangi O‘zbekistonda, muhtaram Prezidentimiz Shavkat Mirziyoyev tashabbusi bilan bunyod etilayotgan O‘zbekistondagi Islom sivilizatsiyasi markazi faoliyatini yangi bosqichga olib chiqishda muhim ahamiyat kasb etishi shubhasizdir”, – dedi O‘zbekistondagi Islom sivilizatsiyasi markazi direktori Firdavs Abduxalikov.
