Erkinjon Turdimovga yana bir vakolat berildi: vazirlikka xodimlarni suhbat asosida ishga olishi mumkin

Ta’lim va ilm-fan vaziri Erkinjon Turdimovga 2027-yil 1-fevralga qadar vazirlik markaziy apparatiga xodimlarni to‘g‘ridan to‘g‘ri suhbat asosida ishga qabul qilish vakolati berildi. Bu Prezidentning 19-oktyabr kuni imzolangan “Ta’lim va ilm-fan vazirligi faoliyatini tashkil etish chora-tadbirlari to‘g‘risida”gi qarorida belgilangan.

 

Qarorga ko‘ra, Ta’lim va ilm-fan vazirligi ta’lim, ilm-fan va ilmiy faoliyat sohasidagi vakolatli respublika ijro etuvchi hokimiyat organi hisoblanadi.

 

Vazirlik faoliyatida autsorsing asosida ikkita faoliyat tashkil etiladi. Jumladan, aholi murojaatlari, shikoyatlari, takliflari va e’tirozlarini qabul qilish, ularni tezkor ko‘rib chiqish hamda tegishli tashkilotlarga yo‘naltirish uchun “Call-markaz” faoliyati yo‘lga qo‘yiladi.

 

Shuningdek, aholi va ta’lim-ilm-fan tizimi xodimlari bilan muntazam muloqot qilish, ta’lim xizmatlari sifati va ommabopligi hamda mavjud muammolar haqida tezkor axborot olish va ularni tahlil qilish maqsadida qayta aloqa tizimi joriy etiladi.

 

Vazir huzurida ta’lim oluvchilar, talabalar, ota-onalar, pedagoglar va ish beruvchilar vakillaridan iborat Ta’lim bo‘yicha jamoatchilik kengashi tashkil etiladi.

 

Vazirlik hay’ati esa vazir, uning o‘rinbosarlari, vazirlik huzuridagi agentliklar direktorlari, yetakchi oliy ta’lim tashkilotlari rektorlari, olimlar va pedagoglar orasidan shakllantiriladigan 15 nafar a’zodan iborat bo‘ladi.

 

Qarorda inson kapitalini rivojlantirish va ta’lim tizimini takomillashtirishga qaratilgan bir qator tashkiliy choralar ham belgilangan. Unga ko‘ra:

 

• Prezident Administratsiyasi huzurida Inson kapitalini rivojlantirish va uzluksiz ta’lim strategiyasini ishlab chiqish bo‘yicha maxsus ishchi guruh tashkil etiladi;
• vazirlik huzurida Inson kapitalini rivojlantirish jamg‘armasi tuziladi;
• vazirlik huzurida Ta’lim va ilm-fan bo‘yicha strategik tadqiqotlar va baholash markazi tashkil etiladi;
• Bilim va malakalarni baholash agentligi Ta’lim va ilm-fan vazirligi huzurida tashkil qilinadi;
• Maktabgacha va maktab ta’limi vazirligi huzuridagi Ta’limni rivojlantirish markazi faoliyati tugatiladi.

 

Eslatib o‘tamiz, avvalroq Bosh vazirning ta’lim, ilm-fan va sog‘liqni saqlash masalalari uchun mas’ul birinchi o‘rinbosari — Ta’lim va ilm-fan vaziri Erkinjon Turdimovga biriktirilgan respublika va mahalliy ijro etuvchi hokimiyat organlari hamda boshqa tashkilotlar ro‘yxati ma’lum bo‘lgandi.