“Oltin qalam” Parijga yetib bordi: fransiyalik jurnalistga mukofot topshirildi

 

O‘zbekiston Jurnalistlar uyushmasi delegatsiyasining Fransiyaga safari doirasida Parijda tantanali marosim bo‘lib o‘tdi. Unda fransiyalik jurnalist, “Georama” nashriyoti asoschisi va direktori Didye Labushga “Oltin qalam” milliy mukofoti topshirildi.

 

Tadbirda jamoatchilik va ekspert doiralari vakillari, vatandoshlar hamda jurnalistlar ishtirok etdi.

 

Marosimda O‘zbekiston Jurnalistlar uyushmasi raisi Shuhrat Oripov mamlakatda so‘z erkinligi va ochiqlikni ta’minlash, jurnalistlarni qo‘llab-quvvatlash borasida amalga oshirilayotgan islohotlar hamda ularning natijalari haqida so‘z yuritdi.

 

Shuningdek, “Oltin qalam” milliy mukofoti doirasida “Xorijlik jurnalistning O‘zbekiston haqidagi eng yaxshi materiali” nominatsiyasining mavjudligi xorijiy ommaviy axborot vositalarida mamlakat haqida tayyorlanayotgan materiallar ko‘payishiga xizmat qilayotgani ta’kidlandi.

 

Didye Labush xalqaro e’tirofdan mamnunligini bildirib, kelgusida O‘zbekistondagi ijtimoiy-siyosiy jarayonlarni yanada kengroq yoritishga intilishini aytdi. Uning ta’kidlashicha, mamlakatning yutuqlari jurnalistlarni ular haqida yozishga undaydi.

 

“Oltin qalam” men uchun shunchaki e’tirof emas. Bunday nufuzli mukofotni qo‘lga kiritish menga ilhom va faxr bag‘ishlaydi”, — deydi u.

 

Marosim yakunida Didye Labush va “Euronews” telekanali muxbiri Galina Polyanskayaga O‘zbekiston Jurnalistlar uyushmasining faxriy a’zolik guvohnomalari ham topshirildi.