2018-yilda rekord, keyingi yillarda pasayish: nikohlar statistikasi
O‘zbekistonda nikohlar soni ketma-ket to‘rt yildan beri kamaymoqda.
Milliy statistika qo‘mitasi ma’lumotlariga ko‘ra, O‘zbekistonda nikohlar soni so‘nggi yillarda pasayib bormoqda. 2026-yilning dastlabki olti oyida 92,3 mingta nikoh rasmiylashtirilgan.
2021-yilda mamlakatda 305,2 mingta nikoh qayd etilgan bo‘lsa, 2022-yilda bu ko‘rsatkich 296,7 mingta, 2023-yilda 283,8 mingta, 2024-yilda 271,8 mingta va 2025-yilda 267,1 mingtani tashkil etgan.
Shunday qilib, 2021–2025-yillarda yillik nikohlar soni 38,1 ming taga kamaygan.
Uzoq muddatli statistikaga ko‘ra, 1991-yilda O‘zbekistonda 270,3 mingta nikoh qayd etilgan. 1995-yilda bu ko‘rsatkich 170,8 mingtagacha tushgan, 2000-yilda esa 168,9 mingtani tashkil qilgan.
Keyingi yillarda nikohlar soni yana oshgan. 2010-yilda 292,3 mingta, 2015-yilda 287,6 mingta, 2018-yilda esa 311,4 mingta nikoh qayd etilgan. Bu 1991–2025-yillar oralig‘idagi eng yuqori ko‘rsatkich hisoblanadi.
