O‘zbekistonga salkam 21 kg narkotik moddani olib o‘tgan shaxslar ushlandi
Hozirda holat yuzasidan jinoyat ishi qo‘zg‘atilgan.
Qo‘shni davlatlar orqali O‘zbekistonga olib kelingan narkotik moddalar to‘xtatib qolindi. Bu haqida DXX Matbuot xizmati xabar bermoqda.
1995 yilda tug‘ilgan Tojikiston fuqarosi Samarqand viloyatining Urgut tumanida yashovchi, 1992 va 2005 yillarda tug‘ilgan 2 nafar shaxs bilan o‘zaro til biriktirib, Tojikistondan O‘zbekistonga aylanma yo‘llar orqali 20 kg 749 gr “opiy” moddasini olib o‘tgan vaqtlarida Davlat xavfsizlik xizmatining Chegara qo‘shinlari harbiy xizmatchilari tomonidan ashyoviy dalillar bilan ushlangan.
Boshqa holatda esa Rossiyadan Qozog‘iston orqali O‘zbekistonga kirish uchun "Dovut-ota" chegara-bojxona postiga kelgan vaqtida, Buxoro viloyatining Peshku tumanida yashovchi 1987 yilda tug‘ilgan shaxs boshqaruvidagi LADA Largus avtomashinasi DXX Chegara qo‘shinlari harbiy xizmatchilari tomonidan o‘rnatilgan tartibda tekshiruvdan o‘tkazilgan.
Tekshirish natijasida unda Moskva shahridan olib kelinayotgan 2 dona ovoz chiqarish kolonkasi ichiga yashirib qo‘yilgan 18 kg 97 gr "mefedron" sintetik narkotik moddasi borligi aniqlanib, tegishli tartibda rasmiylashtirib olingan. Tergovga qadar tekshiruv davomida, u o‘zining shaxsiy avtomashinasida “O‘zbekiston-Rossiya-O‘zbekiston” yo‘nalishida fuqarolarni tashish bilan shug‘ullanishi maʼlum bo‘ldi.
Huquqni muhofaza qiluvchi organ xodimlari tomonidan Farg‘ona viloyatida o‘tkazilgan tezkor tadbirda Farg‘ona tumanida istiqomat qiluvchi 1981 yilda tug‘ilgan, muqaddam giyohvandlik vositalari savdosi bilan bog‘liq jinoyati uchun sudlangan shaxs va 1995 yilda tug‘ilgan, muqaddam o‘g‘rilik jinoyati uchun sudlangan fuqaro o‘zaro til biriktirib, Qirg‘izistondan aylanma yo‘llar orqali olib kelingan 56 000 dona "Regapen" kuchli taʼsir qiluvchi dori vositalarini yashash xonadonlariga yashirib qo‘yganliklari fosh etilgan.
Mazkur xonadonni ko‘zdan kechirish jarayonida qo‘shimcha 6 780 dona "Zardeks" kuchli taʼsir qiluvchi dori vositalari borligi ham maʼlum bo‘lgan.
Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
