Buxorodagi tug‘uruqxonada janjal chiqdi
Shifokorlar bemorning eridan pul talab qilgani aytilmoqda.
Ijtimoiy tarmoqda Buxoro viloyati Shofirkon tumanidagi tug‘uruqxonada erkak ayoli shifoxonadan chiqishi uchun pul talab qilinganini aytib, janjal chiqargani aks etgan video tarqalmoqda.
Holat yuzasidan tuman tibbiyot birlashmasi rasmiy munosabat bildirdi.
Qayd etilishicha, Shofirkon tumani Kalon qishlog‘ida istiqomat qiluvchi M.Islomova joriy yilning 6 oktyabr kuni soat 4-farzandini dunyoga keltirgan. Bolaning vazni 4,5 kg, chaqaloq emlash olganligi munosabati bilan neonatolog–pediatr xulosasiga ko‘ra yana tug‘ruqxonada 1-2 kun tibbiy nazoratda bo‘lishi tushuntirilgan.
Ammo uning turmush o‘rtog‘i bu holatdan norozi bo‘lib, tug‘rukxonada janjal ko‘tarib, oyna va eshik-derazalarni sindirib tashlagan. Zudlik bilan ichki ishlar xodimlari chaqirilgan.
Ayni damda Shofirkon tuman IIB xodimlari tomonidan dastlabki surishtiruv ishlari olib borilmoqda.
