Toshkentda “InnoWeek” haftaligiga start berildi
Haftalikning ilk kunida muhim seminar tashkil etildi.
“InnoWeek.Uz-2024” Xalqaro innovatsion g‘oyalar haftaligi doirasida “Nufuzli xalqaro ilmiy maʼlumotlar bazalaridan foydalanish va kutubxonalarning raqamli transformatsiya darajasini oshirish” mavzusida muhim seminar tashkil etildi.
Seminarni O‘zbekiston Respublikasi Vazirlar mahkamasining departament boshlig‘i Nodirjon Xolbutayev ochib berdi. Mazkur tadbirda mamlakatimizdagi ilmiy-tadqiqot institutlari va oliy taʼlim muassasalari, shuningdek, xalqaro ilmiy maʼlumotlar bazalari bilan ishlash bo‘yicha masʼul xodimlar va xorijiy ekspertlar ishtirok etdilar.
Seminar davomida turli xil platforma va resurslardan foydalanish yo‘nalishidagi imkoniyatlar keng yoritildi. Jumladan, “O‘zbekiston Milliy kutubxonasi” vakillari va xalqaro ekspertlar — Clarivate va mikro Information Handling and Distribution FZE kompaniyalari mutaxassislari o‘z maʼruzalarida ilmiy maʼlumotlar bazalaridan samarali foydalanish, ularni boshqarish va ushbu jarayonlarda raqamli texnologiyalarni qo‘llash mavzulariga to‘xtalib o‘tdilar.
Tadbir yakunida savol-javob formatida davra suhbati tashkil etilib, ishtirokchilarni mavzuga oid qiziqtirgan savollariga mutaxassislar tomonidan javob berildi.
Ushbu seminar mahalliy va xorijiy kutubxonalar o‘rtasidagi aloqalarni mustahkamlashga, ilmiy tadqiqotlar uchun zarur bo‘lgan axborot resurslaridan samarali foydalanish imkoniyatlarini oshirishga xizmat qiladi.
