Mirziyoyev: Xalqimiz hal qiluvchi masalalar bo‘yicha yangi hukumatdan aniq natijalarni kutmoqda
Prezident ishtirokida Oliy Majlis Qonunchilik palatasining majlisi boshlandi.
Kun tartibidan yangilangan Konstitutsiyaga muvofiq, ilk bor quyi palatada bosh vazir lavozimiga nomzod va hukumatning kelgusi 5 yilga mo‘ljallangan harakatlar dasturini ko‘rib chiqish masalalari o‘rin olgan.
So‘zining avvalida davlat rahbari mamlakat o‘z oldiga qo‘ygan strategik va joriy vazifalarni amalga oshirishda barcha bo‘g‘indagi ijro organlari, avvalo, hukumat va uning rahbari zimmasidagi masʼuliyat hozirgi murakkab zamonda har qachongidan ham ortib borayotganini taʼkidladi.
Bugun mutlaqo yangi vakolat va vazifalarga ega bo‘lgan hukumat shakllanayotgani qayd etildi.
Buni Konstitutsiya darajasida birinchi marta kambag‘allikni qisqartirish, oziq-ovqat xavfsizligi, investitsiya, ekologiya kabi muhim yo‘nalishlarda Vazirlar Mahkamasining majburiyatlari belgilab qo‘yilgani ham tasdiqlaydi.
Xalqimiz bugun ana shunday hal qiluvchi masalalar bo‘yicha yangi hukumatdan aniq natijalarni kutmoqda, dedi prezident.
