Surxondaryoda erta turmushni targ‘ib qilgan bloger jazolandi
U erta nikoh holatini ijobiy sharhlab, haqiqatga zid video tayyorlagan.
Ijtimoiy tarmoqda “Surxondaryoda 2008 yilda tug‘ilgan qizning 2 nafar farzandi bor” sarlavhasi ostida video tarqalib, keng muhokamalarga sabab bo‘ldi.
Aniqlanishicha, joriy yilning 21 noyabr kuni blogerlik bilan shug‘ullanuvchi J.N. va S.R. lar o‘zaro kelishgan holda o‘zlarini 15 va 17 yoshdagi voyaga yetmagan ota-ona deb ko‘rsatib videorolikda ishtirok etishgan. Ularning sherigi A.Sh. esa video davomida erta nikoh holatini ijobiy sharhlab, haqiqatga zid vaziyat aks etgan mazkur videoni o‘z Instagram sahifasiga joylagan.
Bolalar ombudsmani so‘roviga ko‘ra, erta nikohni targ‘ib qilish mazmunidagi mazkur holat bo‘yicha bloger A.Sh.ning xatti-harakatlariga baho berish maqsadida ish hujjatlari tuman IIB tomonidan joriy yil 25 noyabr kuni JIB Termiz shahar sudiga yuborilgan.
Sud tomonidan to‘plangan hujjatlar ko‘rib chiqilib, A.Sh.ga nisbatan MJtKning 202-2 moddasi 1 qismi bilan maʼmuriy javobgarlikka tortilib, unga nisbatan BHMning 4 barobari miqdorida jarima jazosi tayinlandi.
J.N. va A.Sh. lar esa bunday nomaqbul harakatlarga yo‘l qo‘ymaslik bo‘yicha ogohlantirilgan.
