O‘zbekistonda ayrim xizmatlarda qog‘oz hujjat talab qilinmaydi: 33 ta idoraviy hujjat o‘zgartirildi
Endilikda banklar, notarial idoralar, aeroportlar va boshqa tashkilotlarda ayrim hujjatlarning elektron shaklidan foydalanish mumkin.
O‘zbekistonda ayrim xizmatlardan foydalanishda hujjatlarning qog‘oz nusxasini taqdim etish talabi bekor qilinmoqda. Adliya vazirligi elektron hujjatlarni qabul qilishga oid o‘zgartirishlarni nazarda tutuvchi idoraviy hujjatlarni davlat ro‘yxatidan o‘tkazdi.
Vazirlik ma’lumotiga ko‘ra, 2026-yil 20-oktyabrda 3958 va 3959-sonlar bilan ro‘yxatdan o‘tkazilgan hujjatlar orqali 33 ta idoraviy hujjatga o‘zgartirish va qo‘shimchalar kiritildi. Ular fuqarolarga hujjatlarning elektron shaklini taqdim etish, tegishli tashkilotlarga esa ularni qabul qilish imkonini beradi.
Jumladan, biometrik pasport, ID-karta, tug‘ilganlik va nikoh guvohnomalari, pensiya guvohnomasi, nogironlik to‘g‘risidagi ma’lumotnoma, urush qatnashchisi guvohnomasi hamda talabalik guvohnomasining my.gov.uz portali va «Ijtimoiy karta» mobil ilovasidagi elektron shaklidan foydalanish mumkin.
Elektron hujjatlar banklarda bank xizmatlaridan foydalanish va ayrim moliyaviy operatsiyalarda shaxsni tasdiqlash, notarial harakatlarni amalga oshirish, O‘zbekiston ichidagi aviareyslarga ro‘yxatdan o‘tish kabi holatlarda qabul qilinadi.
Shuningdek, raqamli hujjatlardan urush qatnashchilariga kompensatsiya berishda, telekommunikatsiya xizmatlari uchun shartnoma tuzishda, qon va uning tarkibiy qismlarini topshirishda donor shaxsini tasdiqlashda, lombardlar bilan shartnoma tuzishda, tibbiy-ijtimoiy muassasalarda pulli xizmatlardan foydalanishda hamda fuqarolarni harbiy ro‘yxatga olishda foydalanish mumkin.
Ma’lumot uchun, 2024-yil 27-dekabrdagi 897-sonli hukumat qaroriga muvofiq, shaxsni tasdiqlovchi va boshqa bir qator hujjatlarning yagona raqamli xizmatlari joriy etilgan.
