“Malika” bozorida quvlashmachoq: qidiruvdagi erkak qochayotganida mashinaga urilib ketdi
Fuqaro avtomobilga urilganiga qaramay, harakatini davom ettirgan, biroq ichki ishlar xodimlari tomonidan qo‘lga olingan.
Ijtimoiy tarmoqlarda “Malika” savdo majmuasi hududida erkakning avtomobilga urilib, qochishda davom etgani aks etgan video tarqaldi. Toshkent shahar Ichki ishlar bosh boshqarmasi holat yuzasidan izoh berdi.
Ma’lum qilinishicha, hodisa 19-oktabr kuni soat 15:10 atrofida Shayxontohur tumanidagi “Malika” savdo majmuasi hududida sodir bo‘lgan. Tezkor boshqaruv markazidan qidiruvda bo‘lgan shaxs shu yerda ekanligi haqida xabar kelib tushgan.
Xodimlar shaxsni aniqlab, uni ushlashga uringan. Biroq erkak qochishga harakat qilgan va harakatlanayotgan vaqtida BYD avtomobiliga urilgan. Shunga qaramay, u qochishda davom etgan. Ichki ishlar xodimlari tezkor harakatlari natijasida uni ushlab, tegishli bo‘limga olib borgan.
Qayd etilishicha, fuqaro bir necha bor tergov harakatlariga chaqirilgan, biroq kelmagani sababli unga nisbatan qidiruv e’lon qilingan va majburiy keltirish belgilangan. Hozirda unga nisbatan tekshiruv harakatlari olib borilmoqda.
Qo‘lga olingan erkak o‘z harakatidan pushaymonligini bildirib, tergov jarayonlarida qatnashish uchun chaqirilganida vaqtida borishi kerak bo‘lganini aytgan. Shuningdek, qonun oldida javob berishga tayyorligini bildirgan.
