Metrodagi “probka”: “Paxtakor”dagi tirbandlikka izoh berildi
Yo‘lovchilar to‘planishini kamaytirish uchun poyezdlar harakati intervallarini qisqartirish choralari ko‘rilmoqda.
Ijtimoiy tarmoqlarda “Paxtakor” metro bekatida yo‘lovchilar tirbandligi yuzaga kelgani haqida xabarlar tarqaldi. “Toshkent metropoliteni” AJ mazkur holat yuzasidan rasmiy munosabat bildirdi.
Qayd etilishicha, hodisa 20-oktabr kuni taxminan soat 17:43 da kuzatilgan. Bekatga ikki poyezdning bir vaqtning o‘zida kelishi yo‘lovchilar oqimining vaqtincha ortishiga sabab bo‘lgan. Metropoliten ma’muriyati bunday holatlar yo‘lovchilar ko‘p bo‘ladigan tig‘iz vaqtlarda kuzatilishini va oqim bir necha daqiqada me’yorlashishini ma’lum qilgan.
Ayni paytda Toshkent metropolitenida kunlik yo‘lovchilar oqimi 1,2 million nafardan oshib borayotgani sabab bekatlarda to‘planishlarni kamaytirish maqsadida poyezdlar harakati intervallarini qisqartirish choralari ko‘rilmoqda.
Unga ko‘ra, poyezdlar harakati intervallari quyidagicha belgilanishi rejalashtirilgan:
-
Chilonzor yo‘nalishida — 1,5–2 daqiqa;
-
O‘zbekiston yo‘nalishida — 3 daqiqa;
-
Yunusobod yo‘nalishida — 4 daqiqa;
-
Yer usti halqa yo‘li yo‘nalishida — 7–8 daqiqa.
Metropoliten ma’muriyati yo‘lovchilar oqimini boshqarish, poyezdlar harakati barqarorligini ta’minlash hamda qulay va xavfsiz transport xizmatini ko‘rsatish bo‘yicha ishlar olib borilayotganini bildirgan.
