“Bolalar — kelajagimiz” degan qarashning o‘zi yetarli emas —Shahnoza Mirziyoyeva
Ijtimoiy himoya milliy agentligi direktorining birinchi o‘rinbosari bolalar farovonligini ta’minlash uchun hukumatlar, biznes vakillari, fuqarolik jamiyati va xalqaro tashkilotlar hamkorligini kuchaytirish zarurligini qayd etdi.
Shahnoza Mirziyoyevaning ta’kidlashicha, bolalar farovonligi haqida gap ketganda, ularni faqat kelajak sifatida ko‘rish yetarli emas. Ota-onalar uchun farzandlar, avvalo, bugungi kunning eng muhim qismidir. Ularning sog‘lomligi, xavfsizligi va o‘zini qadrlangan his qilishi doimiy e’tiborni talab etadi.
Ijtimoiy himoya milliy agentligi direktorining birinchi o‘rinbosari bolalarni himoya qilishga oid har qanday suhbat qonunlar yoki statistik ma’lumotlardan emas, balki oddiy, ammo muhim savoldan boshlanishi lozimligini ta’kidladi: yonida uni himoya qila oladigan katta yoshli inson bo‘lmaganidak, bolaning ahvoli qanday bo‘ladi?
Shahnoza Mirziyoyeva har bir bola yordamga muhtoj bo‘lganida o‘z mamlakati unga tayanch bo‘lishini his qilishi zarurligini qayd etdi.
Shuningdek, u raqamli olamning kundalik hayotga chuqur kirib kelishi, dunyodagi beqarorlik va kuchayib borayotgan keskinliklar bolalar hamda oilalar xavfsizligi va farovonligiga ta’sir ko‘rsatayotganini ta’kidladi.
Uning fikricha, bu muammolarni biror mamlakat yakka o‘zi hal qila olmaydi. Shu bois hukumatlar, biznes vakillari, fuqarolik jamiyati va xalqaro tashkilotlar o‘zaro hamkorlik qilishi, bir-birining tajribasidan o‘rganishi muhim.
Shahnoza Mirziyoyeva bolalarga nisbatan zo‘ravonlikka mutlaqo murosasiz munosabat va har bir bolaga so‘zsiz hurmat tamoyillariga asoslangan madaniyatni shakllantirish zarurligini ta’kidladi.
Uning qayd etishicha, bolalarning baxti, salomatligi va xavfsizligi bugun kattalar zimmasidagi mas’uliyat bo‘lsa, ertaga mamlakatlar va butun dunyoning kelajagi aynan shu bolalarning qo‘lida bo‘ladi. Shu sababli bolalar oldidagi mas’uliyatni kelajakka qoldirmasdan, bugundan boshlash lozim.
