Chegarada noqonuniy ov qilib yurgan 3 kishi qo‘lga tushdi
Ularning yonidan 2 ta ov quroli va go‘sht bo‘laklari topilgan.
Davlat xavfsizlik xizmati chegara qo‘shinlari 9209-harbiy qism xodimlari tomonidan Toshkent viloyati Bo‘stonliq tumanida noqonuniy ov qilib yurgan 3 nafar fuqaro aniqlandi. Holat Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi Bo‘stonliq tuman bo‘limi hamda huquqni muhofaza qilish organlari bilan hamkorlikda o‘rganildi.
O‘rganish natijasida Bo‘stonliq tumani Kichiksoy MFYdagi chegara oldi hududida 3 nafar fuqaro “Ov qilish va ovchilik xo‘jaligi to‘g‘risida”gi qonun, Davlat chegarasi to‘g‘risidagi qonun, O‘zbekiston Respublikasi Davlat chegarasi rejimi va O‘zbekiston Respublikasi hududida chegara rejimi to‘g‘risidagi Nizomlarda ko‘rsatilgan talablarni buzgan holda noqonuniy ov qilib yurgani maʼlum bo‘ldi.
Holat o‘rganilganda ularning yonidan 2 ta ov quroli va ovlangan 1 dona yovvoyi cho‘chqaga tegishli go‘sht bo‘laklari topildi. Noqonuniy ov natijasida tabiatga 11 million so‘mdan ziyod zarar yetkazilgan.
Holatga qonuniy baho berish uchun to‘plangan hujjatlar Bo‘stonliq tuman Jinoyat ishlari bo‘yicha sudiga taqdim etildi. Ov qurollari esa Bo‘stonliq tuman Ichki ishlar bo‘limiga topshirildi.
