Ukraina dronlari Qozondagi aviatsiya zavodiga hujum qildi
Bu vaqtda ayrim aeroportlarda reyslar bekor qilingan.
Rus Telegram-kanallarining xabar berishicha, portlash ovozlari “Gorbunov” nomidagi aviatsiya zavodi va yaqin atrofdagi "Borisoglebskoye" aerodromi hududida eshitilgan.
Rossiya Mudofaa vazirligi dushanbaga o‘tar kechasi mamlakatning yetti hududida 31 ta ukrain droni urib tushirilganini eʼlon qildi. Qayd etilishicha, ulardan faqat bittasi – Tatariston hududida urib tushirilgan. Dronlar hujumi vaqtida Qozon, Nijnekamsk va Ijevsk aeroportlari vaqtinchalik reyslarni qabul qilish va jo‘natishni to‘xtatgan.
“Gorbunov” nomidagi Qozon aviatsiya zavodi Rossiyaning yirik aviatsiya sanoati korxonalaridan biri hisoblanadi. Ushbu zavodda Tu-160 strategik raketa tashuvchi samolyotlari va uzoq masofaga mo‘ljallangan Tu-22M3M/Tu-22M3 bombardimonchi samolyotlari ishlab chiqariladi. Bu turdagi samolyotlar Rossiya Qurolli Kuchlari tomonidan Ukrainaga qarshi zarbalarda faol qo‘llanilmoqda.
