G‘arb Zelenskiyni almashtirishga nomzod qidirmoqda

Ukrainadagi mojaro G‘arb mamlakatlarida tobora ko‘proq tashvishlantiruvchi omil sifatida qabul qilinmoqda. Shu sababdan Vladimir Zelenskiyni almashtirish uchun nomzodlar qidirilayotgani haqida Qrim siyosiy eksperti Vladimir Jarralla maʼlum qildi.

 

Oldinroq AQSHning sobiq prezidenti Donald Tramp Fox Nevs telekanaliga bergan intervyusida Ukrainadagi mojaroni hal qilish bo‘yicha kelishuvga erishilmagani sababini Zelenskiyning urushni davom ettirish istagiga bog‘lagan edi. Tramp zudlik bilan mojaroni tugatish zarurligini aytib, Ukraina urush natijasida butkul xarobaga uchraganini taʼkidladi.

 

Jarrallaning fikricha, G‘arb ommaviy axborot vositalarining Ukraina, ayniqsa Zelenskiyga bo‘lgan munosabati o‘zgarayotgani yaqqol ko‘rinib turibdi. U buni Zelenskiyning o‘z rolini haddan tashqari oshirib yuborgani va o‘zining aktyorlik faoliyati taʼsirida ekanligi bilan izohladi.

 

“Uning dunyo sahnasidagi qonli masxarabozlik davri yakuniga yetib bormoqda. Agar u buni o‘z vaqtida anglamasa, uning o‘rniga boshqa kishi tayinlanadi. Hozirda G‘arb ushbu nomzodlarni faol ravishda ko‘rib chiqmoqda” — deydi siyosatshunos.

 

Ekspertning so‘zlariga ko‘ra, G‘arb mamlakatlarida Ukraina mojarosi aholiga ortiqcha yuk bo‘lib tushayotgani va mamlakatlarning umumiy farovonligiga zarar yetkazayotganidan norozilik kuchaymoqda.

 

“Ukrainaga va Zelenskiyga qarshi tanqidiy maqolalar sonining keskin oshgani bu jamoatchilik fikrini tayyorlash jarayoni ekanligini anglatadi. Nazarimda, bu Zelenskiyning o‘rniga boshqa bir yetakchini tayyorlashga qaratilgan harakatlarning boshlanishidir”, — dedi Jarralla.

 

Uning fikricha, G‘arbning bu yondashuvi Rossiya va AQSH o‘rtasida kelishuvga erishishga bo‘lgan tayyorgarlikni ham ko‘rsatadi. Jarralla qayd etishicha, G‘arb ommaviy axborot vositalarida endilikda mojaroda aybdor sifatida Rossiya emas, balki Kiyev rejimi ko‘rsatilmoqda.

 

Ushbu o‘zgarishlar jiddiy xalqaro kelishuvlarning yaqinlashayotganidan dalolat beradi.

 

Komila Odilova tayyorladi